Сабраныя сродкі пойдуць на дапамогу сацыяльна неабароненым дзецям. Кожны, хто хоча дапамагчы дзецям, якія знаходзяцца ў патрэбе, мае такую магчымасць далучыцца да дабрачынных спраў “Карытас”.
Дабрачынная акцыя “Калядная свечка” праходзіць у Беларусі ўжо многія гады. З кожным годам да акцыі далучаецца ўсё больш вернікаў, а значыць, усё большай колькасці дзяцей удаецца дапамагчы.
З пачаткам Адвэнту такія свечкі распаўсюджваюцца ва ўсіх парафіях Гродзенскай дыяцэзіі, і далучыцца да акцыі могуць усе вернікі і людзі добрай волі.
Дырэктар гродзенскага “Карытас” кс. д-р Раман Рачко адзначыў, што сабраныя ахвяраванні будуць накіраваны на дапамогу дзецям, якія знаходзяцца ў патрэбе: сіротам, паўсіротам, дзецям з малазабяспечаных і шматдзетных сем’яў, дзецям і моладзі, якія з’яўляюцца інвалідамі.
Штогод дзякуючы служэнню “Карытас” сотні дзяцей маюць магчымасць удзельнічаць у летніх аздараўленчых лагерах, наведваць пазнавальныя экскурсіі, удзельнічаць у працы навучальных груп, творчых гурткоў у дзіцячых сацыяльных лагерах, прымаць удзел у спецыяльных святах, атрымліваць адрасную дапамогу.
Дзякуючы ахвяраванням, сабраным ад продажу свечак, мноства дзяцей будуць сагрэты і накормлены, атрымаюць станоўчы досвед малітвы і зносінаў.
Мэта акцыі “Калядная свечка” – данесці дзецям вестку, што Бог і людзі навокал любяць іх, выяўляюць асаблівую ўвагу і клопат аб іх будучыні. Кожная запаленая калядная свечка – асабісты ўнёсак у апеку над сацыяльна неабароненымі дзецьмі. Бо кожны, хто запаліць такую свечку, дапаможа запаліць агеньчык надзеі і дабра ў дзіцячых сэрцах.
Кс. Юрый Марціновіч
