Фотавыстава «Жыццё» адкрылася ў Музеі сучаснага выяўленчага мастацтва ў Мінску. Героямі выставы сталі два унікальных чалавека - адзіная ў Беларусі мадэль з ДЦП Ангеліна Ўэльская і акцёр з сіндромам Даўна Андрэй Гарбаценка.
Ангеліна і Андрэй - таленавітыя, адкрытыя, шчырыя, і служаць прыкладам мужнасці і прыгажосці, упэўнены арганізатары выставы. Гісторыі Ангеліны і Андрэя - гэта яркія сведчанні таго, што людзі з адрознымі магчымасцямі не павінны быць выключаны з жыцця грамадства, што фізычныя абмежаванні не перашкаджаюць прафесійна развівацца, ставіць мэты і дасягаць іх.
«Мы хочам, каб і ў Беларусі ўбачылі, што можна быць паспяховым і шчаслівым, нягледзячы на абставіны і дыягназ. Галоўнае - падтрымка грамадства і сіла характару », - адзначаюць арганізатары выставы.
Педагог-музыка Вольга Ўэльская, мама Ангеліны, рабіла ўсё магчымае, каб навучыць дачку самастойнасці, мэтанакіраванасці і пачуццю ўласнай годнасці.
ДЦП не перашкода - перашкодаў не бывае. Проста трэба не баяцца ісці супраць стэрэатыпаў дзеля сваёй мары і адкінуць усе страхі, упэўненая Вольга Уэльская.
«Я ганаруся сваёй дачкой. И гэта, напэўна, самае галоўнае. Таму што, я заўважыла, у нашым грамадстве, калі дзіця слабое, у бацькоў няма падставы ганарыцца ім. Самі мы, бацькі, зацюківаем дзіця, не даем выйсці наперад. А патэнцыял велізарны. У любым выпадку можна рэалізаваць сябе, нават будучы ў інваліднай калясцы, нават без рук, без ног. Але бацькі, блізкія людзі павінны ганарыцца! Наперад, на людзі! Гэта ж нашы дзеці! Яны таленавітыя!», - Адзначыла мама Ангеліны на адкрыцці фотавыставы.
51-гадовы акцёр аматарскага тэатра Андрэй Гарбаценка вырас у інтэрнатах, цяпер жыве ў аддзяленні суправаджальнага пражывання пры псіханеўралагічным інтэрнаце (без нагляду супрацоўнікаў інтэрната).
Падчас падрыхтоўкі выставы спраўдзілася яго мара - Андрэй трапіў на сцэну прафесійнага тэатра.
Арганізатары выставы спадзяюцца, што прыклад Андрэя дапаможа развіццю ў нашай краіне дэвіянтнага тэатру і дэвіянтнага мастацтва ў цэлым. «Бо людзі з асаблівасцямі маюць велізарны патэнцыял як мастакі, акцёры і аўтары. Але без нашай падтрымкі яны не могуць самастойна развіць свае таленты», - адзначаюць арганізатары выставы.
Фотавыстава «Жыццё» з'яўляецца часткай праекта "Мастацтва за інклюзію людзей з інваліднасцю», накіраванага на фарміраванне станоўчых адносін да людзей з інваліднасцю. Праект рэалізуе Беларуская асацыяцыя дапамогі дзецям-інвалідам і маладым інвалідам пры падтрымцы Агенцтва ЗША па міжнародным развіцці (USAID) і Нацыянальнага цэнтра сучасных мастацтваў.
Працы для выставы зробленыя фатографамі Іванам Бессерам і Андрэем Казека пры дапамозе аператара Аляксандра Пятрова і візажыста Марыі Дарапіевіч.
Па матэрыялах naviny.by
